FINESSE se Manlief van die Jaar raak elke jaar meer opwindend! Dit word al moeiliker om net een uit die duisende inskrywings te kies. Dis die lekkerste gevoel om te weet daar is soveel wonderlike mans! Geliefde mans, oor wie hulle vroue gek is.

Ons beoordelaars was net so beïndruk! Nadat ons die finaliste aangewys het, moes die beoordelaars kies. Zane Meas en sy vrou, Megan; Rina Hugo en haar man, Johan van Rensburg; en Liesel Krause-Wiid en haar man, Siebert, het gehelp om die wenner te kies. Daarna was dit natuurlik julle beurt – en die SMS’e het behoorlik ingestroom. Ons hoop jou gunsteling het gewen!

Pieter Lombard (49) van Gordonsbaai is baie skugter oor die hele Manlief-ding … hy gee sy vrou, Elize, al die skuld! Op sy eie, vertel hy, sou hy hom nooit in so iets begewe het nie. Iemand het hom blykbaar reeds as ’n Manlief-finalis herken en in Pick ’n Pay voorgekeer: “Ek wou sommer met my kop onder die rakke induik … ek’s regtig baie skaam.” Hoewel dit vir hom ’n eer is, is hy nie ’n man wat loop en spog nie. Sy nuwe titel reflekteer eerder wat sy vrou van hom dink.

Pieter is baie trots op sy gesin wat so na aan God leef en ander inspireer. Nie omdat sy vrou siek is en oor hulle gestremde seuntjie nie, maar omdat hulle mekaar innig liefhet. Pieter is gek oor sy vrou omdat sy hom in alles bystaan en nooit oor enigiets verwyt nie. Dan sê hy: “My vrou is ’n geskenk van God, en as ek haar te na kom, kom ek Hom te na.”

Elize borrel behoorlik as jy haar oor Pieter pols. “My arme man! Ek het nie besef daar gaan ’n fotosessie en als wees nie!” giggel sy toe die foto’s pas klaar geneem is en sy reg is vir ’n paar vrae.

Wat is die een ding wat jy vir Pieter wens?

Rus. Pieter werk regtig hard aan die besigheid wat hy twee jaar gelede begin het. En wanneer hy gedaan tuis kom, help hy in en om die huis, en veral met Wynand (8), ons gestremde seun. Wynand kan niks vir homself doen nie, en hy is al so swaar, ek kan hom nie meer dra nie. As dit nie vir Pieter was nie … Ons het al baie saam by Wynand se bed gesit en huil as hy siek was. Dit maak nie saak hoe gestremd jou kind is nie, ’n ouer is nooit gereed vir ’n kind om te sterf nie. Ek en Pieter dra mekaar hierdeur. Dit het ons verhouding beslis versterk.

Verder is ek ’n onstabiele diabeet wat vier keer per dag insulien moet kry. Soms het ek ook Pieter se hulp nodig. Dit het al gebeur dat Pieter gelyk met my en Wynand spook. Ek weet hy is moeg, al sê hy dit nooit nie.

Is Pieter meer soos Superman, Chuck Norris of MacGyver?

Meer soos MacGyver, die planmaker. Maar hy is ook beslis my Superman!

Wat bewonder jy die meeste omtrent Pieter?

Die lewe en liefde wat hy uitstraal. En sy rustigheid. Pieter sal nie sommer opgewerk raak nie, hy benader probleme logies en bly kalm al is die omstandighede om hom ook hoe rof.

Stel ons almal gerus: Baklei jy en Pieter soms, en waaroor?

Ja, ons baklei ook maar soos enige getroude paar. Maar hoe ons dit hanteer, is belangrik. Ons baklei nie lelik nie, en sal nooit kwaad gaan slaap nie.
Soms kom ek moeg en knorrig by die huis. Dan sal die wag voor my mond partymaal ’n bitsige aanmerking laat deurglip! As dit gebeur, sal Pieter sy arms om my sit en sê: “Ek kan sien jy’t ’n rowwe dag gehad.”
Om die waarheid te sê, ons lewe is so besig, daar is nie regtig tyd vir baklei nie. Dalk is dit die geheim: Ons wil ons oomblikke saam geniet, nie om baklei nie.

Hoe bly julle gelukkig getroud?

God is die basis van ons huwelik, en Hy laat alles ten goede meewerk. Van ons kant af sou ek sê dis wedersydse respek; ons is beste vriende en vennote. Ons bid saam en waardeer mekaar. Daardie geykte raad wat almal gee, dat jy altyd aan jou huwelik moet werk, is beslis waar. Moet mekaar nooit as vanselfsprekend aanvaar nie. Ons leef elke dag asof dit ons laaste is … en soms verras ons mekaar, wanneer die ander een dit die minste verwag.

Pieter en Elize is nog effens verstom oor die Manlief-titel – so asof hulle liefde vir mekaar agter elke bos uitgeskop word. Maar ons weet dat hierdie twee mense iets besonders het en dat ons baie by hulle kan leer. Dis nooit “wat” met jou gebeur nie, maar “hoe” jy dit laat afloop.

Geniet jou man, al raak hy voor die televisie aan die slaap. Waardeer hom, al maak hy jou soms kwaad. Onthou, elke man is net ’n mens, maar dis jý wat van hom ’n MANLIEF maak!

Pieter Lombard (WENNER)

Kliek hier om meer oor Pieter te lees en na sy video te kyk!

Willie Pieterse

Kliek hier om meer oor Wille te lees en na sy video te kyk!

Jaco Leon Hanekom

Kliek hier om meer oor Jaco te lees!

Ali Chris Brown

Kliek hier om meer oor Ali te lees en na sy video te kyk!

Cilliers van Zyl (3de plek)

Kliek hier om meer oor Cilliers te lees en na sy video te kyk!

David Norval (2de plek)

Kliek hier om meer oor David te lees!

Dirk van der Westhuizen

Kliek hier om meer oor Dirk te lees en na sy video te kyk!

Janco Vorster

Kliek hier om meer oor Janco te lees!

Jakkie Mellet

Kliek hier om meer oor Jakkie te lees en na sy video te kyk!

Kobus van Zyl

Kliek hier om meer oor Kobus te lees en na sy video te kyk!

Op 24.05.2001 het die Here ons geseën met ’n baie spesiale baba.  Hy was perfek gebore, maar sy hartjie het 3 keer gaan staan na geboorte. Hy het die ergste graad van breinskade opgedoen wat daar bestaan. Volgens die medici is ons bondeltjie liefde ’n wonderwerk. Niemand kan glo dat hy vandag nog lewe nie. Hy kan nie sit, loop, staan, praat of selfs sluk nie, en word deur middel van ’n buisie gevoed.

My man se liefde vir my en ons  kinders is so groot. Hy slaap met my en sy siek baba op die bed, kry nooit ooit genoeg rus nie, want hy moet so lig slaap dat hy kan hoor wanneer wynand ’n asem nood het, of ek in ’n diabetiese “hypo” ingaan. Dit het al ’n paar keer gebeur dat hy op dieselfde tyd met beide van ons moet spartel – kan jy dink hoe erg dit moet wees??

Hy maak my elke oggend wakker met koffie, en dan is my badwater reeds getap. Saans wanneer ek pootuit is na werk, sal hy vir my ’n lekker skuimbad tap en kerse aansteek en daarna nog ’n lekker massering ook gee.

My manlief kla nooit ooit nie. Hy is werklik die wonderlikste mens in die hele wye wêreld. – Ek dank die Here elke dag vir hom, want ek weet soveel huwelike sou al verbrokkel het met omstandighede soos ons s’n.

Ek is in Junie 2008, ouderdom 29, met borskanker gediagnoseer. Nadat die nuus oorgedra is het hy dadelik vir my gesê, “Ek gee nie om hoe jy gaan lyk, dis vir JOU wat ek liefhet.” Elke toets en chemosessie was hy daar. Hy het my letterlik met sy hand agter my rug teen opdraendes opgehelp en saam my gerus waar nodig. Saam het ons dan bo uitgekom. Ek weet “hierdie vrou” het maar oes gelyk, maar hy het gesorg dat my siel blom. Hy moes man wees, pa wees vir Deandré (toe 1 en ’n half), werk, kosmaak, skoonmaak en my probeer laat fokus. Daar is niks waarvan hy nie ’n sukses maak nie. Ons het gewen!!

Die standvastigheid wat hy uitstraal weens sy vertroue in God? Of die sterkte van sy karakter in ‘n kultuur waar daar min of geen intergiteit is nie? Dis al die en nog meer. Hy’s  my beste vriend.

En in sy oë is ek die “hottest” en die beste. In die sprokiesverhale waar die prins en prinses altyd “happily ever after” leef, leef ek elke dag my gelukkige einde uit en dank ek God dat Hy my  gesëën het met my man.

Boonop laat hy my saam met my vriendinne in die Kaap vakansie hou, terwyl hy die kinders oppas. Jakkie antwoord altyd sy selfoon as ek bel. My man is ongelooflik!?

Na ‘n opehart operasie op 5 jaar het Janco se gesondheid geskommel van angsnagte en vreugdes ‘n vergrote hart en skokbehandelings, maar hierdie “siekte” was nog net ‘n bedekte seen.

Hy is ons  kinders se “hero”,  ek moet gedurig raas  oor die speletjies wat nie wil ent kry nie. Hy dra ons op sy hande, oorlaai ons met sy liefde.  Hy bedien ons met koffie, trek die gordyne oop en wil weet wat doen ons vandag?

Hy omhels die lewe – gryp die dag, maar is nooit ver van sy gesin nie – ons is deel van alles!

Ek is gedurig bewus van sy stille krag in God  wat die Bron van sy lewe is. Galasiers 5:22-23 beskryf my man:  “As die Gees ons lewe beheer, is die gevolg liefde, vreugde, vrede, geduld, vriendlikheid, goedheid, getrouheid, sagmoedigheid en selfbeheersing. Ons het dalk nie baie geld nie, maar ons is ryk aan liefde.

My skool kys! Jy was ’n arm seun, maar die rykste mens wat ek geken het. Vars geplukte rosies uit die bure se tuin, jou sakgeld uitgebel na my toe en liefdes briefies gelos op my venster bank. Het ek jou waarlik waardeer?

HERFS  (Warrelwind KOVSIE jare)

Swaarkry jare wat ek nie gevoel het nie, besef ek nou! Jy het my alles gespaar en wou net die beste vir my bied. Sekerlik vandaar die mooi grys strepies in jou hare? 5 km elke dag na rugby oefening na my toe geloop om te kom kuier.

WINTER (liefde, leed en geluk)

Sprokies troue dan ons gesin! Die Here het gesê wag. Op 12 Junie 2008 ’n miskraam. Jy het my gedra deur hierdie donkerste tyd. Ons was bitterlik hartseer. Presies 12 Junie 2009 is Edrich gebore. Wonderwerk! Dankie vir slapelose nagte saam,  rus wat jy mamma gun om te gaan “shop”,  vuil doeke ruil en jou sensitiewe aard. Jy is Palief van die Jaar vir my! En Ja ek waardeer jou opreg!

Hy is my vriend, rots, steunpillaar en my motivering.  Hy dra my op sy hande en laat my al 7 jaar lank soos ’n prinses voel!! Nie net is hy goed vir my nie, hy het my ook oneindig lief en mens kan dit in al sy dade sien.

Hy vat af by die werk  om vir my ’n broodjie en ’n melkie te bring, hy doen my filling vir die werk! Hy maak my broodjies elke dag, los vir my ’n slukkie koffie elke môre, was my kar, gaan koop my produkte vir my salon, tuck my in elke aand,  doen sy ‘kriek’ dans as ek sad is, maak kos, vertroetel my as ek siek is, koop Astros as ek down is, supprise my, laat my lag en bederf my.

Hy maak my lewe ’n groot PLESIER!!!!

Jy droom daarvan om ‘n nuwe voertuig te koop, maar jy koop lusern omdat dit so droog is en installeer ‘n lugversorger in die kombuis omdat ek so warm kry. Onselfsugtig gee jy altyd jou drome op vir my drome .

Elke oggend bid jy vir ons, en ek weet my dag begin reg, want jy ken God. .  Jy is een van min woorde, maar as ek in jou oe kyk, voel ek net liefde en omgee.

Ek vlieg hoog, Eduard, want jy is die wind van liefde onder my vlerke. DANKIE