MAAK JÓÚ KIND ’N SUPERKIND!

Jy het groot drome vir jou kind. Soos elke ouer. Jy droom oor goeie gesondheid, ’n wonderlike lewensmaat, geleerdheid, goeie werk, genoeg geld ... en natuurlik geluk! Maar dan gebeur die resessie, rekeninge, te veel goed om te doen en te min tyd, verkeerde vriende en ’n swak skoolrapport. Iewers het jy jou kind verloor. Daardie opgewonde gesiggie wat haar eerste kersie doodgeblaas het, is nou dikmond, lui en ’n vreemdeling.

En al maak sy jou woedend, breek jou hart ’n duisend keer wanneer sy met dowwe oë omdraai en lusteloos na haar kamer drentel ... Wat het verkeerd geloop? Jy sal die antwoorde hier kry! Elke ouer wat hierdie artikel lees, sal ’n superkind kan grootmaak. ’n Kind wat gelukkig en gebalanseerd is, en wat die nodige vaardighede het om die wêreld te oorrompel en hulle eie plek daarin te vind en te vul.

2012-05-17

Het jy geweet?

Die helfte van Suid-Afrika se tieners drink alkohol. Bitter min ouers weet hulle kinders drink of rook dagga.
Kinders so jonk as twaalf jaar stuur halfkaal foto’s van hulleself per selfoon aan vriende.
Suid-Afrika het die agtste hoogste tienerselfmoordsyfer. Die getal selfmoorde onder kinders is amper net so hoog soos dié van volwassenes.
Wêreldwyd slaap kinders ’n uur minder as dertig jaar gelede. Daardie verlore uur het ’n negatiewe invloed op hulle intelligensie, emosionele welstand en gewig.

Word wakker! Ons ouerskapstyl is outyds en oneffektief. Jy kan of wil dit dalk nie glo nie, maar dis nie net ander mense se kinders wat so maak nie – dit kan jou kind se werklikheid wees.

Daar is duisende boeke en artikels oor ouerskap, so, hulp is beskikbaar. Hoekom sukkel ons dan so? Ons weet self nie meer wat die regte of verkeerde benadering is nie en val dan maar terug op die ou manier van doen, want “dit het vir almal voor ons gewerk”.

En dan? Die wêreld het verander en so ook die eise wat dit aan jongmense stel. Maar kinders word dieselfde opgevoed as voorheen. Soos die skrywer Seth Godin dit stel: “Ons betree ’n revolusie van idees, terwyl ons ’n generasie voorberei wat eerder instruksies wil hê.” Jy kan nie jou kinders op dieselfde manier grootmaak as wat jou ouers jou grootgemaak het nie, want dit werk nie meer in 2012 nie. Is jy ook, soos die meerderheid ouers, traag om aan te pas en verantwoordelikheid vir jou kinders te aanvaar? Kyk die werklikheid in die oë en verander.

Ons onbetrokkenheid is dikwels die wortel van alle (kinder)kwaad. Dit is nie skole se verantwoordelikheid om kinders op te voed nie. En ekstra klasse los nie leerprobleme op nie. Die verantwoordelikhede word dikwels op ander mense afgeskuif, sodat dit nie moet voel asof ons gefaal het nie.

Albert Einstein het gesê dit is malligheid om dieselfde ding oor en oor te doen en nuwe resultate te verwag. Is jy bereid om ’n kans te waag met iets anders as jou huidige manier van doen? Want dis tyd dat ons verantwoordelikheid vir ons kinders aanvaar. Tyd dat ons aktief by ons kinders se lewens betrokke raak en bereid raak om ander roetes te volg as normaalweg.

Marelize Dreyer het as vierjarige haar Kumon-reis begin en voltooi haar finale toets enkele dae voor haar sestiende verjaarsdag. Wat hierdie prestasie uitsonderlik maak, is dat sy op sestienjarige ouderdom derdejaar- universiteitswiskunde baasgeraak het. Slegs ’n baie klein persentasie studente voltooi Kumon, maar Marelize het ...

Hoe het sy dit reggekry? Marelize het op haar eindpunt begin fokus en die groot doel in kleiner doelwitte opgebreek. Sy het twaalf jaar lank elke dag, ook tydens skoolvakansies, ’n Kumon-boekie voltooi. Haar Kumon-boekies is oral saamgery – van familiekuiers tot vakansieplekke. Sy het ure aan selfstudie en soektogte op die internet gewy. Haar ouers, Sanet en Gerrit, het haar aangemoedig en herinner aan die unieke prestasie wat sy gaan behaal. Sy het een van haar pa se gunsteling-aanhalings uit Apollo 13 uit, “failure is not an option!” haar eie gemaak.

Die Dreyers se storie kan ook jou storie word, maar net as jy ’n teenvoeter vir die wêreld se talent-obsessie word. Jou kind moet weet dat sy kan kies hoe slim sy is. Maar in plaas daarvan sukkel baie kinders met ’n swak selfbeeld.

Dit is nie goed genoeg om jou kinders Sondagoggend by die kerk af te laai en te dink jy doen genoeg om hulle geestelike lewe te laat ontwikkel nie. Jy maak ŉ groot fout as jy dink die nuwe CD van ’n gospel-rockgroep gaan haar op die regte pad hou. Waardevorming begin by jóú. Jou kind kan al die talente en besittings in die wêreld hê, maar sonder ’n sterk geestelike fondasie gaan sy nie waarlik gelukkig en suksesvol kan wees nie.

Kyk jy daardie nuwe fliek saam met hulle en gesels agterna openhartig oor die temas wat daarin aangeraak word? Of los jy hulle om maar enigiets te kyk wat hulle wil? Ouers se traak-my-nie-agtige houding belemmer kinders se waarde-vorming. Kyk maar om jou: onaktiewe, oorgewig kinders ... kinders wat mekaar via hulle selfone boelie ... kinders wat meen hulle is geregtig op enigiets wat hulle hart begeer en dat hulle alles móét hê wat hulle maats het ... kinders wat net sit en wag vir sukses om na hulle kant toe te kom, in plaas van om daarvoor te werk. Dit kan jóú kind wees!

Druk

Deel met ander

0 Kommentaar

argief

DIS AMPER VAKANSIETYD!
Ai jong ... Jy hou die kalender dop en met groot oë besef jy dat dit een van die dae skoolvakansie is.
HOE OM JOU KIND GELUKKIG TE MAAK …
Meer as T-hemde en tekkies, veel meer én op n ander vlak, is nodig om kinders werklik gelukkig te maak.
HOE OM HARDKOPPIGE KINDERS TE HANTEER
Sy is koppig en moeilik en altyd reg om dwars te trek. Hoe help jy jou eiesinnige kind om te blom – sonder dat jý kop...
HOE VEILIG IS JOU KIND HIERDIE MAAND?
Oor minder as 'n week sluit die skole en dan is ons land se kinders vir 6 weke op vakansie weens die Sokker Wêreldbeker.
MAAK JOU KINDERS STERK
Is jou kind regtig gereed om die stampe en stote van die lewe te hanteer? In 'n onvoorspelbare wêreld is dít een van die beste v...
MAAK JOU HUIS ’N TUISTE
"Waarom bring my kind nooit haar vriende huis toe nie?" wonder jy. Hier is 'n paar kreatiewe aanpassings waarmee jy kan verseker d...
KWEEK RESPEK BY JOU KIND
Voorletters uitkerf op bome, 'n gevloek, 'n laatkommery en smalende aanmerkings oor ander kulture is maar enkele voorbeelde van disrespek ...
AANVAAR DIE BRUID
Jou seun wil trou … maar hoe gemaak as jy nie tevrede is met sy keuse vir 'n bruid nie?
JOU KIND AS JY SKEI
Vir jou is egskeiding 'n uitkoms ná 'n ongelukkige huwelik, maar hoekom voel jou kinders dan so skuldig?
GRENSE VIR KINDERS
Die meeste kinders smag na groter vryheid in byna alles wat hulle doen. Maar wat moet wanneer toegelaat word?