61 BEÏNVLOED MY MENSTRUASIESIKLUS MY GEWIG? gewig TIPS Articles www.voelgoed.co.za

BEÏNVLOED MY MENSTRUASIESIKLUS MY GEWIG?

BEÏNVLOED MY MENSTRUASIESIKLUS MY GEWIG?

Vind jy soms dat jy gewig aangesit het selfs wanneer jy jou dieet getrou gevolg het? Dis heel waarskynlik jou menstruele siklus wat vir die gewigstoename verantwoordelik is. 

In ’n onlangse studie is bevind dat die meeste vroue tussen 1,9 en 2 kg swaarder kan weeg in die eerste fase van hulle menstruele siklus.

 

2012-05-04Amanda Kuit

 Gewigstoename op sekere tye van jou menstruele siklus is ’n tydelike verskynsel. Indien jy op ’n gewigsverliesprogram is, sal waar jy in jou menstruele siklus trek, wel die afmetings en syfers op die skaal ietwat beïnvloed. 

Jou metaboliese spoed daal deur die loop van jou menstruele siklus en is op sy laagste punt op dag 14 (dit is so ’n week voor ovulasie). Vanaf dag 14 verander baie dinge in jou liggaam, wat insluit ’n verandering in temperatuur en die styging van die progesteroonvlak tot op dag 21. Daarna begin die progesteroonvlak daal en die metaboliese spoed styg. Jou metaboliese spoed is op sy hoogste een dag voor jy begin menstrueer. Dit is gewoonlik in hierdie tyd net voor menstruasie dat die ondier in jou wakker gemaak word en jy sjokolade en koek aanval!

Hierdie verhoging in metaboliese spoed is ongeveer 1 500 kJ, wat omtrent gelyk is aan die kilojoules van vyf snye brood. Jy sal in hierdie fase dus aanhou eet tot jou liggaam genoeg energie bymekaargemaak het om vir die verhoogde metaboliese spoed te kompenseer. 

Na hierdie ondier-eetfase vind jy dan gewoonlik dat jy gewig opgetel het. In ’n onlangse studie is bevind dat die meeste vroue tussen 1,9 en 2 kg swaarder kan weeg in die eerste fase van hulle menstruele siklus. Hierdie gewigstoename is veral opgemerk in vroue wat sukkel met PMS. Simptome wat tydens PMS tot die tydelike toename in gewig bydra, is waterretensie en opgeblaasheid. Baie vroue ervaar ook gedeeltelike hardlywigheid in hierdie eerste fase, wat ook hulle gewig kan beïnvloed.

Die toename in jou gewig tydens hierdie fase is dus nie werklike gewigstoename nie. Die ekstra kilojoules wat jou liggaam benodig, kan wel jou gewigsverliesprogram beïnvloed, veral as jy op ’n dieet met min kilojoules is of  een wat hoog in proteïene is. Jou drang na koek, suiker en sjokolade sal jy nie kan keer nie. Die rede hiervoor is baie eenvoudig: As jy te min stysel inneem en jou liggaam benodig energie, sal jou brein impulse stuur wat jou lus sal maak vir stysel!
 
Indien jy op ’n gewigsverliesprogram is, is dit belangrik dat die eetprogram voorsiening moet maak vir hierdie ekstra kilojoules wat jou liggaam nodig gaan hê – gewoonlik vanaf dag 23 tot dag 28. As jy jou inname van vrugte verhoog, sal dit help om die lus vir suiker en sjokolade te verminder. Een appel (145 g) bevat ongeveer 380 kJ – eet dus drie ekstra appels. Kies die Pink Lady appel, wat ’n bietjie soeter is. Druiwe of  ’n mango is ook lekker soet. As dit nog nie soet genoeg is vir jou nie, probeer rosyne. Jy kan tot 120 g eet om die ekstra kilojoules te kry wat jou liggaam benodig.
 
Indien jy dit nie regkry om van sjokolade af weg te bly nie, probeer eerder donker sjokolade met neute as gevulde sjokolade. Jy mag egter net 50 g eet om die ekstra kilojoules in te kry. Onthou net, jy kan nie die appel, rosyne én sjokolade eet nie ... kies net een!
 
Alles kalmeer weer so vyf tot sewe dae nadat jy begin menstrueer het. Vir weegdoeleindes is dit dus goed om jou tussen dag 8 en dag 12 van jou menstruele siklus te weeg. 
 

argief

soek op voelgoed

 

 

 

voelgoed

vermaak

 

 

   vg TV [kyk dit]


  

   vg OUDIO [luister dit]