Om dinge georganiseerd te hou in gedeelde ruimtes is ’n uitdaging. So wanneer dit by organisering kom is dit belangrik om iets te vind wat vir jou soos tweede natuur is. As die eetkamertafel gewoonlik die plek is waar jy jou handsak en sleutels neergooi as jy van die werk af kom, is dit juis die plek waar jy ’n houer of hak nodig het om hierdie items te “huisves” (as ek dit so kan noem.) Nou terwyl hierdie dalk ’n oplossing is vir jou en persoonlik vir jou goed werk, kan dit dalk die teenoorgestelde wees vir die res van jou gesin. So as jou kinders hulle huiswerk die hele TV-kamer vol los en manlief sy aktetas net daar by die deur op die vloer neer smyt en jy die een is wat dit maar noodgedwonge optel, hier is ’n paar idees om julle almal op die regte spoor te kry: 

•               Hou huisvergaderings, ten minste eenkeer per week, oor hierdie gedeelde areas in die huis. Hierdie areas word deur almal gebruik en daarom is dit belangrik om te praat oor ’n organiseringstyl wat almal gaan pas. Wenk: Hou hierdie vergaderings wanneer almal in ’m redelike goeie bui en kalm is.

•               Sit in ’n sirkel sodat almal “gelyk” is en gee elkeen die geleentheid om te sê waarvan hy/sy hou van hierdie spesifieke area, wat vir hom/haar werk, wat hy/sy sal wil verander en bereid is om te doen en om die area georganiseerd te hou.

•               Sit alles op ’n lys en besluit dan saam watter reëls dan vir hierdie area geld (vir almal).

•               As almal ingekoop het op hierdie reëls sal “op die spoor bly” nie meer so moeilik wees nie.

o              Maak seker om vir elkeen ’n rol  te gee wat hy/sy moet vervul in die deurlopende organisering en netheid van die vertrek.

o              Skeduleer weeklikse blits-sessies vir organisering en opruimwerk om seker te maak dié spasie bly so netjies en skoon as moontlik.

Goed, noudat die leefareas in jou huis uitgesorteer en jy nie meer hoef skaam te kry as vriende of familie vinnig inval vir ’n koppie tee nie, kan ons aanbeweeg. Volgende week kyk ons na hoe om daardie “gedoen” - lysie in die “gedoen” lysie om te skakel.

Vir Tracey se vorige blog, kliek hier.