Jesus het die dood en Satan aan die kruis oorwin, en daarmee het Hy aangetoon dat Hy oor elke mag seëvier. Wanneer ’n gelowige by Jesus skuil, kan sy deur geen bose mag leed aangedoen word nie. Jesus se mag oortref elke ander mag. Daarom het ons ook niks te vrese van enigiets of enigiemand nie.

Nietemin moet ons ook besef dat ons hier op aarde geen behoorlike begrip het van hoe die geestelike dimensie werk nie. Paulus sê duidelik “ons stryd is nie teen vlees en bloed nie, maar teen elke mag en gesag, teen elke gees wat heers oor hierdie sondige wêreld, teen elke bose gees in die lug” (Ef. 6:12). Baie teoloë sal dadelik hier inspring en sê dat ons dit nie letterlik kan opneem nie, omdat ons hier rekening moet hou met die denkwêreld van die antieke mens wat geglo het dat die lug bokant ons vol bose geeste is. Hulle voeg dan by dat moderne mense nie daarmee kan saamstem nie. Maar is dit reg om alles so maklik van die tafel af te vee en dit dan as afgehandel te beskou? Ek is ook nie seker of teoloë altyd daar in hulle studeerkamer ten volle verstaan hoe die magte van die duisternis werk nie. Ons teorieë hou nie altyd rekening met die praktyk nie.

Ons het hier met ’n dimensie te make wat buite ons alledaagse raamwerk lê, en daarom moet ons inderdaad versigtig wees. Dit is waar dat die Bybel ons nie juis vertel of dooie voorwerpe inderdaad die een of ander mag kan uitstraal nie. Ons het eintlik bitter min inligting oor die ewige stryd tussen boosheid en God (buiten dat Openbaring ons vertel dat die bose met Jesus se wederkoms sy laaste stuiptrekkings sal gee, en dan finaal oorwin sal word). In die hemel sal daar geen boosheid meer wees nie.

Daarom bly ek versigtig en sal ek geen item in my huis aanhou wat wel enige assosiasie met die bose kan hê nie. Dit sal ook nie rym met my getuienis nie. ’n Christen kan tog nie in sy huis (sê) dolosse van ’n toordokter uitstal of ’n simbool van satanisme teen die muur ophang, of iets wat met die Hindoe-godsdiens geassosieer word nie. Ek durf nooit enige geleentheid aan die duiwel gee om op enige manier ’n houvas op my te kry nie. Petrus (1 Pet. 5:8) waarsku ons nie verniet nie: “Wees nugter, wees wakker! Julle vyand, die duiwel, loop rond soos ’n brullende leeu, op soek na iemand om te verslind.”

Aan die een kant kan ’n mens ’n fout maak deur te veel mag aan die bose toe te ken. Hy verdien nie daardie eer nie. Aan die ander kant kan ’n mens ook die fout maak om die bose se mag te onderskat. Kortom, sonder om nou neuroties te word daaroor, moet ’n mens tog probeer om nie enige voorwerp wat met die bose geassosieer word, in jou lewensruimte in te bring nie.