Hier is drie stappe om die situasie te hanteer:

STAP 1: PRAAT MET JOU KIND

•    In plaas daarvan om die onderwerp te vermy, doen moeite om alleentyd saam met jou kind te hê sodat julle daaroor kan gesels.
•    Praat openlik en eerlik en deel jou gevoelens sodat dit nie broeikans kry nie. Maar deel ook jou geesdrif en vaste voorneme om saam met hom én haar hierdie nuwe fase te laat werk.
•    Maak seker dat julle aan dieselfde kant van die draad staan sodat hy nie die onmoontlike keuse tussen sy ma en sy vrou moet maak nie. Só behou jy jou kind én kry jy nog een by.

STAP 2: LEER HAAR WÊRELD KEN

•    Kweek begrip vir die aanstaande vroutjie deur moeite te doen om meer van haar agtergrond te leer.
•    Vra haar uit oor haar belangstellings en doen ’n bietjie navorsing daaroor. Jy verbreed nie net jou kennis en lewensuitkyk nie, maar nou het julle ook ’n aanknopingspunt – iets om oor te praat eerder as om mekaar net uit te kyk en te veroordeel in daardie ongemaklike stiltes. Sy beleef waarskynlik dat jy na haar uitreik.

STAP 3: BEHANDEL HULLE AS GELYKES

•    Die veronderstelling dat die man die oudste moet wees, is lank reeds uitgedien. Met jongmense wat vroeg reeds selfstandig in die vreemde gereis en gewerk het, het hulle soveel keuses en is hulle soveel meer volwasse in hulle lewensuitkyk as vorige geslagte.
•    Die belangrikste is dat jou seun gelukkig is. Tensy daar ernstige waarskuwingstekens is, kan jy dus maar jou kind se oordeel vertrou.
•    Dan bly daar eintlik net een ding oor om te doen: Bid lewenslank vir seën op hulle huwelik.