UIT! SLEGTE MANIERE

96% professionele werknemers sê hulle kollegas toon slegte maniere by die werk. Gelukkig probeer die meeste van ons nie aspris om ongeskik te wees nie. Jy is net nie altyd bewus van jou slegte maniertjies nie. Op die lang duur kan dié klein jakkalsies egter jou werksverhoudinge in die wiele ry, sê Peter Post, direkteur van die Emily Post Instituut.

Meeste mense werk in klein, oopplan kantore. Jou private gesprekke, middagetes met vreemde geure en selfs raserige tegnologie, kan ander kollegas gek maak. Die oplossing is om bewus te wees van die omgewing waarin jy werk en te wonder hoe jy sou optree indien jy in jou kollega se skoene was.

IN! RESPEK

Die laaste ding wat jy wil hê, is om oor die vingers getik te word omdat jy disrespekvol teenoor jou kollegas of jou baas opgetree het. Bly so in almal se goeie boekies:
1.    Bly positief! Jy wil nie bekend staan as “Nina Negatief” nie. Boonop is ’n negatiewe houding disrespekvol teenoor jou kollegas wat graag die werk so goed as moontlik gedoen wil kry.
2.    Vermy die skindertonge. Jy sal gerespekteer word as die een wat nie betrokke raak by hy-sê-sy-sê-debatte nie.
3.    Byt gou jou tong voor jy vurig wil raak oor jou baas se nuutste besluit. ’n Tantrum oor besluite wat deur jou seniors geneem is, is alles behalwe professioneel.


UIT! FLIRT

Jy mag dalk dink ’n warm kantoorromanse is ’n groot avontuur. Dat dit nie jou werk kan skade doen nie. En ook nie jou beeld nie. Want wie sal nou weet? Maar oppas! Verál as jy reeds ’n ring aan jou vinger het.

“As jy jou man kan verneuk, sal jy waarskynlik enigiemand anders – kollegas ingesluit – ook kan verneuk. Getroude mense wat nie skroom om kantoorromanses aan te knoop nie, word vinnig gebrandmerk as oneerlik, onbetroubaar en skelm,” sê Robert Hogan, skrywer van meer as 200 sielkundeboeke.
Hogan sê egbreuk (affairs) word oor dieselfde kam geskeer as mense wat nie belasting betaal nie, dronk word in die openbaar en selfs vandalisme – alles het te doen met die breek van reëls en disrespek vir gesag.

IN! NEE

Jy word gevra om die kantoorpartytjie te reël. En jy het nie tyd nie maar is bang om nee te sê; netnou klink jy onbeskof. Hierdie waardevolle tips van Karen Leland, kenner van kantooretiket, sal jou help om beskaafd te weier:
•    “Ek sal dit met liefde wil doen, maar vra my weer op ’n ander keer.”
•    “Ek weet hoe belangrik dit is, en ek voel sleg, maar moet ongelukkig nee sê.”
•    Probeer die doodeenvoudige manier van: “Ek het eenvoudig net te veel goed waaraan ek op dié stadium moet aandag gee. Jammer.”

Bronne:
www.huffingtonpost.com
www.forbes.com
www.respectfulworkplace.com
www.howtodothings.com