Is jou korrels koeëlrond en sappig of lyk hulle meer na uitgedroogte rosyntjies?

Roomys, klere, appels en pere. Dít is die items wat ’n winkel moet verkoop of ’n boom moet dra om onderskeidelik as ’n roomyswinkel, ’n klerewinkel, ’n appel- of peerboom bekend te kan staan.

So moet iemand wat haarself ’n Christen wil noem ook sekere eienskappe hê. In Galasiërs 5 word dié eienskappe gelys as die vrugte van die Gees, naamlik liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

Dra jy vrugte van plastiek?

Ek onthou ’n dag toe ek saam met my ouers by mense gaan kuier het. Op die koffietafel was ’n groot bak sappige druiwe – my mond het behoorlik gewater. Toe die gasvrou die vertrek verlaat het ek soos ’n weerligstraal opgespring om een van die druiwekorrels te pluk. Tot my ontsteltenis moes ek uitvind: Dit is plastiek!

Is dit nie dieselfde met sommige mense nie? Hulle lyk goed aan die buitekant; soet en sappig. Ons stal hulle op voorblaaie van glanstydskrifte en koerante uit en hulle is ons helde. Maar as die ware toets kom – wat is aan die binnekant?
Die Here is meer geïnteresseerd in dit wat aan jou binnekant is – juis omdat goeie dade misleidend kan wees. Maar die Woord waarsku ook in Jakobus 2:26 dat ‘geloof wat nie tot dade kom nie, dood is’.

Dra almal dadelik vrugte?

As jy ’n jong plantjie by die kwekery koop en in jou tuin uitplant, gaan dit nie onmiddellik vrugte dra nie want die plantjie se wortels moet eers by die omgewing aanpas en in die grond afgroei om water en voedingstowwe te kry.

Nuwe gelowiges is dieselfde as hierdie plantjie. Hulle moet ook eers ‘aanpas’ by die nuwe omgewing en leefstyl en die beste ‘kunsmis’ vir dié groeiproses is die Woord van die Here (Rom.10:17).

Wat verhoed ons om vrug te dra?

Wanneer ons onbelyde sondes in ons lewe vertroetel, begin ons grondlangs groei. Ons kwyn weg en dra geen vrugte nie. Dit is dan dat die Boer met pynlike maatreëls ingryp. As daar dus moeilike, soms pynvolle, oomblikke oor jou pad kom (en jy weet dat sonde die oorsaak daarvan is), moet jy onthou dat die Here besig is om aan jou te snoei.

Vrugte kom met tyd

Bekende outeur Rick Warren sê: “Ons moet onthou dat die vrug van die Gees nie iets is wat onsself kan bewerkstellig nie. Dit is iets wat God in ons tot stand bring. Maak jouself dus vol met die Woord. Vra die Heilige Gees om volle beheer oor jou lewe te neem. Aanvaar jou omstandighede as deel van God se plan om jou lewe te verander. Vra Hom om jou te help om reg op te tree teenoor moeilike mense en in slegte situasies, net soos Jesus sou doen.”

God is besig om aan jou druiwetrossie te werk en seker te maak al die korrels is koeëlrond en sappig. Plant jouself in Hom en voor jy jou oë uitvee is jy dalk die trossie wat Hy sal kies as Hy deur die laning stap!