24 ONDERLAAG - JOU NOMMER EEN WAPEN jou lyf Articles www.voelgoed.co.za

ONDERLAAG - JOU NOMMER EEN WAPEN

ONDERLAAG - JOU NOMMER EEN WAPEN

Jy kan nog wegkom met goedkoop maskara en lipstiffie, maar die verkeerde onderlaag laat jou oud en afgeleef lyk.

2011-11-29

Die regte een daarenteen kan jou soos ’n model laat lyk.

Hier is ’n paar praktiese wenke om jou die regte onderlaag te kies en dit reg aan te wend:

•    Onderlaag en plooie

“Plooie word veroorsaak deur verskillende faktore, soos sonskade, dehidrasie, rook en spierbewegings,” sê Linda O’Connel van Maybelline. Grimering kan nie plooie veroorsaak nie en is beslis nie die rede hoekom jy lagplooie kry nie. Dit kan wel jou plooie meer opvallend maak. Swaar grimering wat nie by jou veltipe pas nie, kan jou plooie beklemtoon. Hou liewer by ligte grimering onder jou oë deur slegs verbloemer te gebruik, en vermy onderlaag en poeier in dié area.

Onthou ook om altyd oogroom aan te wend. Dit kan lagplooie verminder en selfs voorkom, en help dat grimering beter aanwend. Pasop om nie aan die oogarea te trek wanneer jy room of grimering aanwend nie. Dié vel is baie delikaat en kan maklik sakkerig lyk. Gebruik jou vingers of ’n kwassie om met ligte tikbewegings die area te bedek. Baie handelsmerke het verbloemer wat spesifiek vir die oogarea geformuleer is, en dit werk gewoonlik die beste om donker kringe te verbloem.

•    Die regte kleur

Baie vroue toets onderlaag op hulle hand of nek, en dan is dit nie die regte kleur vir hulle gesig nie. Toets altyd onderlaag op jou gesig. Smeer dit in ’n streep aan van jou wang tot by jou kakebeen. Gaan dan buitetoe en kyk hoe die kleur in die sonlig lyk. Natuurlike lig gee gewoonlik die beste aanduiding van hoe die kleur by jou velkleur pas. Maybelline het ’n verskeidenheid van 12 skakerings in die nuwe FIT ME onderlaagreeks. 

As jy nie die perfekte skakering kan kry nie, kies twee kleure wat die naaste aan jou velkleur is en meng hulle. Jou vel is ook geneig om donkerder te wees in die somer. Meng dan net ’n bietjie meer van die donkerder skakering by.

As jy steeds onseker voel, vra ’n grimeerkunstenaar om jou te help om die regte skakering te kry. Hou ook jou veltipe in gedagte wanneer jy onderlaag kies.

•    Sit só aan

Die warmte van jou vinger is fantasties om verbloemer liggies in te skakeer. As jy ’n kwas gebruik, hou dit skoon deur dit minstens weekliks te was. Gebruik sommer sjampoe en hou die kwas na onder wanneer jy dit afspoel om die haartjies bymekaar te hou. As die haartjies eers deurmekaar begin staan, is dit moeilik om onderlaag daarmee aan te wend. ’n Onderlaagkwas gee ’n meer afgeronde voorkoms. Die vel onder die oog is delikaat en daarom is 'n sponsie of vinger dee beste om verbloemer mee aan te wend.

Maar of jy nou jou hande, ’n kwas of ’n sponsie gebruik, maak altyd seker dat jou onderlaag goed ingeskakeer is. ’n Onderlaagstreep op jou kakebeen laat jou onafgerond en onprofessioneel lyk. Gebruik jou tyd om die onderlaag mooi eweredig aan te wend. As jy haastig is, gaan jy met strepe sit en eerder soos ’n sebra lyk!

Kommentaar

gesels saam

argief

soek op voelgoed

 

 

 

voelgoed

vermaak

 

 

   vg TV [kyk dit]


  

   vg OUDIO [luister dit]