Kies die regte produk

Dis belangrik om 'n produk te kies wat die beste vir jou sal werk. 'n Room of 'n mousse sal goed werk as jy geduldig en perfeksionisties is. 'n Sproei werk goed vir groter areas en om strepe te voorkom.

Moenie te donker gaan nie

As jy 'n baie donker verbruiningsmiddel gebruik, gaan dit nie eg lyk nie. Maak nie saak wat jou velkleur is nie, moenie 'n donkerder kleur as medium gebruik nie. Jy kan altyd 'n ekstra laag aanwend tot jy tevrede is, eerder as om te begin met 'n baie donker kleur wat jou vreemd laat lyk.

Berei goed voor

Berei jou vel voor deur elke oggend vir ’n paar dae af te skilfer ("exfoliate"). Gebruik ook baie bevogtiger gedurende hierdie tyd, maar nie onmiddellik voor jy selfverbruiningsmiddels gebruik nie. Skeer die dag voor die tyd.

Begin betyds

So jy het ’n groot gebeurtenis soos ’n troue of spoggeleentheid om die draai. Moenie wag tot ’n dag voor die tyd nie! Elke persoon se vel reageer anders, daarom moet jy vroegtydig seker maak dat die produk aan jou verwagtinge voldoen.

Werk stadig en deeglik

Terwyl jy die verbruiningsmiddel aanwend, werk stadig en vryf die produk heeltemal in. Dit help om strepe te voorkom.

Beskerm jou hande

Was jou hande gereeld terwyl jy die verbruiningsmiddel aanwend. As jy dit nie doen nie, gaan jou hande verkleur en sal almal weet dat jou sonbruin vel eintlik uit ’n bottel kom. Om oranje hande heeltemal te vermy, gebruik latekshandskoene.

Varieer kleurdiepte

Moenie dieselfde diepte kleur oor jou hele lyf aanwend nie. ’n Mens se sonbrand is gewoonlik nie oral dieselfde nie, dus gaan dit onnatuurlik lyk as jou hele lyf dieselfde kleur is. Wend die produk liggies aan op die bokant van jou voete, om jou enkels en op jou hande.

Moenie ou produkte gebruik nie

Vervang jou verbruiningsmiddel elke jaar. Indien dit te oud raak, gaan jou vel waarskynlik dieselfde kleur bly as wat dit was voor jy die middel aangewend het.

Voorkom sonligskade

Moenie vergeet om jou vel teen die son te beskerm nie. Daar is getinte sonskerms spesifiek vir die gesig en ook vir die lyf. Dit blokkeer nie net gevaarlike sonstrale nie, maar verskaf ook 'n tikkie brons.

Wat om ná aanwending te doen

Nadat jy die middel aangewend het, dra los, donker klere. Moet vir 6 - 8 ure na aanwending nie stort nie. As jy normaalweg jou vel gereeld afskilfer, wag eers 'n paar dae voordat jy dit weer doen.

Bronne

•   http://www.beautifulmakeupsearch.com/beauty-blog/2007/5/7/self-tanning-dos-
donts.html
•    http://findarticles.com/p/articles/mi_m0846/is_10_23?pnum=4&opg=n6092053&
tag=artBody;col1
•    http://www.wnetwork.com/articles/styleT1.asp?id=679
•    http://beauty.ivillage.com/skinbody/0,,j4s6-4,00.html