“Dit is moontlik om ’n normale lewe met diabetes 2 te ly. Toe ek uitvind ek het diabetes, het dit gevoel of my wêreld tot ’n einde kom. My dokter het pille voorgeskryf en my na ’n dieetkundige verwys. Dit het aanpassings en opofferings geverg, maar vandag beheer ek my toestand deur ’n gesonde gebalanseerde dieet en oefening, sonder enige pille.

Kennis is mag:

Aan die begin was ek baie onseker oor my toestand. Ek het nie geweet hoekom ek diabetes gekry het nie. Ek wou ook meer weet oor hoe om dit te beheer. Daarom het ek begin navorsing doen deur boeke te lees en die internet te gebruik. Ek het by ’n ondersteuningsgroep aangesluit, lesings bywoon wat deur Diabetes SA Pretoria aangebied word en Pick ’n Pay se Diabetic Tour bygewoon. Hoe meer jy oor jou siektetoestand weet, hoe meer kan jy vir jouself doen.

Jy is wat jy eet:

Ek het my eetgewoontes verander en eet nou meestal lae glukose indeks kosse. Deur dié dieet het ek 15 kg in 3 maande verloor en my bloedsuiker onder beheer gekry. Ek eet kosse wat laag is in suiker en vet soos volgrane, groente en soms vrugte. Ek probeer om lekkergoed, pasta, vrugtesap, gaskoeldrank en verfynde koolhidrate uit te sny. Ek eet gereeld tussenhappies om my suiker konstant te hou, sodat ek nie moeg voel later in die dag nie. Dit is baie belangrik om jou bloedsuiker gereeld te toets en seker te maak jy’s nog op koers.

Baie mense dink dat diabetes geen lekkernye beteken. As jy ’n diabeet is, kan jy steeds lekkergoed eet. Jy moet net baie minder daarvan eet. Daar is baie Suid-Afrikaanse lae glukose resepteboeke beskikbaar wat jou kan riglyne gee oor gesonde eetgewoontes.

Maak ’n verskil:

Ek het ’n webtuiste geskep www.ptadiabetes.org vir Diabetes SA Pretoria om mense met diabetes in kontak met mekaar te bring, hulle op hoogte te hou van wat in die diabeteswêreld aangaan en om hulle stories vir mekaar te kan vertel. Onthou daar is ander mense soos jy wat dieselfde ervarings deurgegaan het wat jou kan help of wie jy kan help. Waar ek voorheen deur ander mense se ervarings geleer het, kan ek nou terugploeg en vir mense wat pas gediagnoseer is, help met die pad vorentoe.

Vandag is ek dankbaar vir wat diabetes vir my beteken het. Dit het my geleer om gesonder te leef. Ek eet gesonder. Ek oefen meer. Ek en my familie doen meer saam, omdat ons saam fietsry en stap. Ek voel ook baie meer gesonder as voor ek gediagnoseer is. Waar ek voorheen altyd moeg was en nooit genoeg slaap kon kry nie, het ek nou genoeg energie om my deur die dag te dra. Diabetes het definitief ’n positiewe verskil in my lewe gemaak en sonder die siekte sou ek tien teen een net aangeploeter het met my ongesonde gewoontes.