Vallei van Sluiers vertel die storie van drie bekende Bolandse vrugteboerfamilies: die De Bruyns, die Robertses en die Van Rhijns wat in onmin, twiste en skandale by mekaar ingetrek word.

Maar vir Yvonne van den Berg wat die rol van Chloe Breedt speel, was daar ongelukkig geen sluiertjie in sig by die maak van Vallei van Sluiers nie. Haar karakter is ’n wulpse vrou wat met ’n skatryk boer, Luke, getroud is. Wanneer Luke weg is op een van sy (menige) sakereise, speel Chloe bietjie aan die “anderkant van die draad.”

Yvonne sê toe sy begin met die verfilming van hierdie nuwe 13-episode reeks het meeste van haar tekste met die volgende aanwysings begin: Chloe in bikini by swembad. Chloe in bikini in die sitkamer. Chloe in bikini op die stoep. Dan het Yvonne maar die klein bikini wat die kostuumafdeling vir haar in haar aantrekkamer reggesit het, aangetrek, haar volgende toneel gaan doen, en dan haar na haar kamer gehaas om gou ’n paar stomach-crunches te doen. “Ek was meeste van die tyd net in ’n swembroek of kaal,” vertel Yvonne.

“Ons het net na die Kersvakansie begin skiet en ek het toe nog nie kans gehad om die vakansievetjies af te skud nie, lag die mooi blondekop aktrise.  “Ek het maar net heeltyd gehoop hulle neem my in ‘sagte’ lig af.” Maar of sy met of sonder sluier speel, Yvonne het niks om voor skaam te wees nie. Vir ’n vrou al diep in haar 30’s met twee tienerdogters hoef Yvonne vir geen model terug te staan nie.

Yvonne sê dis nie omdat sy self daarin speel nie, maar Vallei van Sluiers is “rêrig goed”, en ons moet almal kyk wanneer dit begin speel!