Maar selfs as jy net stap bevorder dit jou fiksheid en gesondheid. Begin dus stap en namate jy fikser word, kan jy die intensiteit van jou oefensessie verhoog deur vir kort rukkies tussenin te draf. Dit sal progesteroonafskeiding verhoog wat vetverbranding aanhelp en dus baie meer effektief wees as jy wil verslank. Indien jy gereeld oefen sal jou liggaam leer om vet in plaas van glukose te verbrand en te gebruik vir energie. Dis interessant om te weet dat die beste oefening vir vetverbranding nie baie stremmende of uitputtende oefening is nie, maar eerder matige oefening op gereelde basis vir langer periodes – 30 minute of meer.

As jy baie onfiks is, moet jy stadig begin stap en geleidelik jou tempo versnel totdat jy later met kort tussenposes kan draf. Begin hiermee eers as jy minstens 30 minute lank teen ’n flinke pas kan stap.

STAP SÓ

Stap teen ’n flinke pas, maar so dat jy nog kan gesels terwyl jy stap. Gebruik jou arms sterker as wanneer jy rustig stap. Buig die arms sowat 90° en swaai hulle flink vorentoe en agtertoe. Die grootste gedeelte van jou stapintervalle moet uit aërobiese stap bestaan, maar as jy baie onfiks is, hou vir eers by rustige stap. Indien jy fikser is kan jy ligte handgewiggies vashou terwyl jy stap – dit sal jou oefenprogram meer uitdagend maak. Later kan jy selfs met gewiggies om jou voete stap (nadat jy natuurlik goed opgewarm het!)

ONTHOU!

* Indien jy ouer as 35 jaar is laat jou bloeddruk, bloedsuiker en cholesterol bepaal deur jou dokter en vra hom om ook ? EKG en ortopediese ondersoek te doen, voordat jy met hierdie oefenprogram begin.
* As jy enige pyn in jou knieë ondervind wanneer jy na draf oorgaan, hou eerder by stap.