Kragslapies

Herlaai jou battery en gee jouself ’n energie-hupstoot met kort kragslapies. Probeer om ten minste ’n halfuur of langer te slaap want as jy vir minder as ’n halfuur slaap gaan jy bewerig en traag wakker word. Die beste tyd om te dut is rondom twee uur in die middag want jou liggaamstemperatuur verlaag natuurlik ongeveer agt ure nadat jy wakker geword het.

Stresvry

Kweek ’n stresvrye slaaptyd roetine. Vermy rekenaars en enige veeleisende intellektuele werk, vir minstens ’n uur voordat jy gaan slaap, om jou brein kans te gee om te ontspan en af te skakel van situasies wat slapelose nagte kan veroorsaak. Probeer ontspannende aktiwiteite soos lees, mediteer of luister musiek. Dra oorpluisies of ’n oogmasker as jou slaap omgewing te lawaaierig of lig is.

Week jou sorge weg

Verskeie aromaterapie olies is bekend vir hulle ontspannings-eienskappe. Klim in ’n lekker warm bad met ’n paar druppels laventelolie in, net voor slaaptyd. Sprinkel sommer ’n paar druppels op jou kussing ook. Rooswater is besonder effektief vir slaaploosheid wat veroorsaak word deur depressie, terwyl kamille rustige slaap bevorder.

Goedvoel faktor

’n Warm, soet, melkdrankie rondom slapenstyd sal jou help om te slaap omdat suiker die breinselle in staat stel om meer triptofaan, wat deur melkproteïne verskaf word, in jou bloedstroom op te neem. Dit word omgesit in die goedvoel breinchemikalie, serotonien, wat jou kalmeer en laat ontspan.

Nee vir stimulante

Kafeïen, sigarette, alkohol en medikasie, voorgeskryf of nie, kan slaap ontwrig. Kafeïen stimuleer die senuweestelsel en verhoog adrenalien produksie, wat jou angstig en wakker hou. ’n Koppie tee of koffie voor slapenstyd mag jou aanvanklik help om te slaap, maar kan jou slaap later ontwrig. As jy regtig nie jou laataand koffietjie kan opoffer nie, sorg dan dat dit kafeïenvry is. Rokers se slaap is meer onderbroke as nie-rokers s’n – so los liewer daardie laataand dampie.

Roetine

Probeer om ’n vaste opstaan en slaaptyd te handhaaf om jou biologiese klok te sinchroniseer. Dit sal jou liggaam help om die ritme te vind tussen diep slaap en helder wakker. As jy glad nie kan slaap nie, staan op en doen iets vervelig totdat jy regtig vaak is. As jy die volgende dag moeg voel, sal dit jou help om daardie aand beter te slaap.