’n Program wat deurmekaar loop, vergete verjaardae, ’n moedelose kind wat vir jou wag, ’n wasmasjien sonder waspoeier en ’n gevoel van ek-is-niemeer- in-beheer-nie hoef nie jou voorland te wees, net omdat die jare aanstap nie. Met kennis, die regte kos en ’n aanvulling of twee kan jy weer vlymskerp van alles onthou.

Die belangrikste chemikalie vir geheue is asetielcholien – dit klink miskien vir die meeste van ons net na nog ’n groot woord, maar dit is nogtans een wat ons moet probeer onthou (dis nie ’n grappie nie). Diegene wat ’n tekort aan hierdie chemikalie het, ondervind ’n afname in hul geheue en is die kollega wat elke nou en dan haar kollega se naam sal vergeet.

Die meeste doeltreffende aanvullings wat onomwonde bewys het dat dit ’n beduidende uitwerking op geheue het, is of ’n voorloper vir die samestelling van asetielcholien of hulle vervoer die asetielcholien na die sel.

DIE BOUSTENE
(van asetielcholien)

Onthou jy nog hoe jou ouma gesê het jy moet vis eet voor ’n eksamen omdat dit goed is vir die brein? Dit was nie ouvroustories nie … Die belangrike goed wat jou brein nodig het om behoorlik te funksioneer, word dikwels in vis aangetref! Asetielcholien bestaan uit die voedingstof, cholien, wat in vis en eiers voorkom.

By die Duke Universiteit se mediese sentrum is hoë dosisse cholien aan dragtige rotte gevoer en die resultaat het getoon dat hul kroos benydenswaardige breine gehad het. Navorsing het ook bewys dat hoë dosisse cholien volwasse geheue kan verbeter – en jy dog daar is nie hulp vir jou nie!

Daar is ook bewys dat ’n voorloper vir cholien, DMAE, wat volop in vis soos sardientjies en ansjovis is, ’n voordelige uitwerking het op wakkerheid, geheue, konsentrasie en aandagtyd. Die voordeel van hierdie middel is dat
dit vinniger by die breinselle uitkom.

DIE TAXI
(transport na die brein)

Die aflewering van asetielcholien aan breinselle maak staat op taxi’s (reseptorareas rondom selrande) om te help met vervoer. Twee belangrike taxi’s is: PS (“phosphatidylserine” – toemaar jy hoef nie dié groot woord te onthou nie) en DHA (’n omega-3-vetsuur). PS-aanvullings verbeter gemoedstemming, geheue, vermoë om te leer en konsentrasie – hierdie stof word deur ons liggame vervaardig, maar moet nog steeds aangevul word deur dieet.

Die tweede taxi wat genoem behoort te word, is DHA, ’n omega-3-vetsuur wat in salm en tuna voorkom. Jy is seker teen dié tyd al moeg van luister na die wonderwerking van omega-vetsure, maar hul voordele vir jou gesondheid kan nie genoeg beklemtoon word nie – veral wanneer dit gaan om die funksionering van jou brein.

Diegene met hoë vlakke DHA in hul bloed het ook hoë vlakke asetielcholien in die brein. ’n Bykomende voordeel van DHA is dat dit ook help met depressiesimptome.

GEWONE VERDAGTES
(vitamiene en minerale)

Vitamiene en minerale is nodig vir alle prosesse in die liggaam en so ook vir die geheue. Die belangrikste vitamiene is die B-vitamiene. Hier is hul funksies:

• B3 - Verbeter geheue
• B5 - Verbeter geheue en wakkerheid
  
• B6 - Help om neuro-oordraers te vervaardig
  
• B12 - Versnel die leertempo van rotte
  
• Folaat - Help om suurstof aan die brein te lewer
  

Wat beteken dié inligting vir jou?

• Wend ’n daadwerklike poging aan om meer gereeld vis te bedien – jou geheue sal nie net verbeter nie, maar jou kinders sal begin presteer op skool en wie weet ... jou man sal miskien uiteindelik jul huweliksherdenking onthou!
• Maak seker dat jy en jou gesin ’n goeie multivitamien neem wat al die B-vitamiene en noodsaaklike minerale bevat.
  
• Probeer om ’n omegavetsuuraanvulling te kry wat vir jou werk.