Is jou vel droog en sensitief?

 “Ek is mal oor die gevoel van ’n skoongeskropte gesig, maar die verkeerde reiniger kan my vel baie uitdroog,” sê aktrise en TV-aanbieder Anel Alexander. “Deesdae maak ek staat op La Mer Cleansing Gel, R795. Dit is ideaal vir my kombinasievel. Soms is my vel sensitief van al die ‘mishandeling’ op stel en ander kere weer baie olierig van al die grimering. Dan het ek ’n goeie produk nodig wat deeglik reinig, maar steeds sagkens met my vel werk. La Mer Cleansing Gel maak my vel silwerskoon, sonder dat dit styf en droog voel. My vel lyk sommer gesond nadat ek dit gebruik het. En nog ’n lekkerte is dat die produk my minstens vyf maande lank hou. Dis beslis waarde vir geld!”

Skoene wat vir jou oefen!

Jou dubbelverdiepingstiletto’s is so ongemaklik as wat kan kom, maar ten minste gee dit jou bene oefening! Wat as jy mode en oefening kan kombineer? Nouja, jy kan! Die Mukluk- reeks, R1 395, is nie net ’n moet-hê vir modeslawe nie, maar die onderste sool bestaan uit ’n mikro-“waggelbord” wat jou spiere oefen en vorm terwyl jy loop. Jy kan hierdie sandale of insteekskoene gemaklik saam met jou jeans dra en steeds in die modekol wees!
DJ Suga van Good Hope FM is ’n groot aanhanger. “Ek is versot op my paar. Ek hou hulle in my kar, en sodra ek my hoëhakke kan uittrek, is my Mukluks aan my voete.” Vir meer inligting en ’n handelaar naby jou, besoek www.fitflop.com.

Kaneelolie vir ’n voller mond

Beeldskone bekendes soos Angelina Jolie en Hunter Tylo spog met verleidelike vol lippe. En as skoonheidsikone so lyk, is dit geen wonder dat die normale vrou ook plomper lippe begeer nie. Daarom kan jy seker wees jou gunstelinggrimeerhuis het ’n produk wat plomper lippe belowe – van lipglans tot lipopknappers.Probeer egter gerus eers kaneelolie, wat net so doeltreffend werk.

Volgens Amerikaanse skoonheidskenner Diane Irons bring die olie die bloed na jou lippe toe, wat dit vir vier uur plomper kan laat lyk. Natuurlik is dit ook ’n fantastiese bevogtiger wat goed werk onder lipstiffie. Maar voor jy dit gebruik, maan Diane: “Toets dit eers op jou gewrig vir rooiheid, swelling en jeukerigheid, omdat baie mense allergies daarvoor is.”
Bron geraadpleeg: www.webmd.com

Die bob is steeds top!
 
Daar is sekere haarstyle wat ons nooit weer wil sien nie. Dink maar aan die stywe perm! Maar die klassieke polkastyl kom keer op keer terug, telkens met ’n eie tendens. Hierdie seisoen kan jy jou haarstilis vir ’n presisie-polka (precision bob) vra. Dis ’n sexy styl wat gewoonlik deur ’n reguit kuif gekenmerk word. Dit kan wissel van kort tot lank, en jou haarstilis sal jou unieke gelaatstrekke in ag neem om die polka vir jou te laat werk. Anders kan jy soos die glansmense lewe gee aan jou polka deur dit in sagte kartels te dra, soos Charelize Theron en Vera Farmiga. Die styl werk goed vir reguit en effens gegolfde hare, maar bly weg as jou hare erg kroes.