EK EET NIE BAIE GESOND NIE, IS ’N MULTIVITAMIEN VOLDOENDE OF MOET EK ’N BYKOMENDE KALSIUMAANVULLING OOK NEEM?

Dit is altyd goed om aanvullings te drink, want deesdae se kitskosse bevat nie naastenby genoeg vitamiene en minerale nie. Maar ongelukkig is ’n multivitamien nie voldoende vir beengesondheid nie. Jy sal beslis iets ekstra moet neem!

As jy osteoporose wil voorkom, benodig jy spesifieke minerale en vitamiene in die regte hoeveelhede, wat gewoonlik hoër is as wat in ’n multivitamien voorkom. Volgens onlangse navorsing benodig jy 800 IU vitamien D3 en 1200mg elementale kalsium per dag om osteoporose te voorkom.
 
Die helfte van die kalsium wat jy inneem, moet uit jou dieet uit kom. En die ander helfte uit aanvullings, want jy kan slegs 500mg elementale kalsium per keer absorbeer. Dan moet jy ook onthou, kalsium kan nie volkome geabsorbeer word sonder vitamien K2 nie en dié vitamien is noodsaaklik om kalsium aan die been te verbind. Probeer MenaCal.7 wat al die regte vitamiene en minerale bevat!

KAN KALSIUM JOU RISIKO VIR HARTSIEKTES VERHOOG OMDAT DIT IN AARWANDE SAAMPAK?

Dit is gedeeltelik waar. In 2008 het die Universiteit van Auckland in Nieu-Seeland bevind dat menopousale vroue wat kalsiumaanvullings van ’n 1000mg per dag neem, moontlik hulle risiko vir ’n hartaanval kan verdubbel. Die rede is dat kalsium in die are kan aanpak, en verstopte are kan lei tot hartsiektes. Die navorsingsgroep het egter 1000mg elementale kalsium geneem en nog ’n 1000mg uit voedsel, wat meer as die daaglikse aanbeveling van 1500 mg is.
 
Gelukkig is daar ’n veilige manier om kalsium te neem. Vitamien K2 hou kalsium waar dit hoort – in jou bene! Die vitamien aktiveer belangrike proteïene wat help om bene te bou en trek ook kalsium uit die bloed wat gesirkuleer word en saampak in are. Navorsing wys dat lae vlakke van vitamien K2 grootliks kan bydra tot die ontwikkeling van osteoporose. Kies daarom altyd ’n kalsiumaanvulling wat dié vitamien bevat.

KAN JY TÉ VEEL KALSIUM INNEEM? EK EN MY MAN DRINK ALBEI KALSIUMAANVULLINGS, MAAR HY EET OOK BAIE SUIWELPRODUKTE.

Te veel kalsium kan sleg wees, veral as jy onlangse studies in ag neem wat wys dat hoë hoeveelhede kalsium jou man se risiko vir prostaatkanker kan verhoog. ’n Harvard studie het bevind dat mans wat tussen 1500mg en 1999mg elementale kalsium per dag inneem, hulle risiko vir prostaatkanker verdubbel. En mans wat meer as 2000mg inneem, het ’n vier keer groter risiko as mans wat slegs 500 mg kalsium neem!

Die studie is egter nog nie klaar nie, maar dit lyk of te veel kalsium jou man se lyf keer om genoeg vitamien D te vervaardig – wat keer dat prostaatkankerselle vermeerder.
Maar vir beskerming teen osteoporose en kolonkanker, het jou man omtrent 700 mg elementale kalsium per dag nodig. Matigheid is daarom die beste strategie vir jou man. Bly by die aanbevole daaglikse hoeveelheid van 1 000 mg vir mans en 1 200-1 500 mg vir vroue.